நடிகர் கௌதம் கார்த்திக், நெப்போலியன் மற்றும் பிரியா ஆனந்த் ஆகியோர் நடித்து தமிழகத்தின் திரையரங்குகளில் ஓடிக்கொண்டிருக்கும் முத்துராமலிங்கம் படத்திற்கு தடை விதித்து சென்னை நீதிமன்றம் உத்தரவிட்டுள்ளது.

முத்துராமலிங்கம் படம் கடந்த வெள்ளிக்கிழமை வெளியானது. இந்த படத்தின் தயாரிப்பாளர் விஜய் பிரகாஷ் என்பவர், யாகூ பைனான்ஸ் கன்சல்டண்ட் என்ற நிறுவனத்தின் உரிமையாளர் எம்.வி.பிரகாஷ் என்பவரிடம் ரூ.29 லட்சம் கடனாக வாங்கியதாகவும், அதை இதுவரை திருப்பவில்லை என்பதால், அது தொடர்பாக சென்னை உயர் நீதிமன்றத்தில் ஏற்கனவே வழக்கு தொடரப்பட்டது.

எனவே அந்த தொகையை விஜய் பிரகாஷ் திருப்பி தர வேண்டும் என நீதிமன்றம் உத்தரவிட்டது. ஆனால், அதன்பின்னும், அந்த தொகை திருப்பித் தரப்படவில்லை. இதனால், முத்துராமலிங்கம் படத்தை திரையிட தடை விதிக்க வேண்டும் என எம்.வி.பிரகாஷ் சார்பில் மீண்டும் மனு தாக்கல் செய்யப்பட்டது.

எனவே, முத்துராமலிங்கம் படத்தை திரையிட தடை விதித்து நீதிபதி உத்தரவிட்டார். இதனால் படக்குழுவினர் அதிர்ச்சியடைந்துள்ளனர். இந்த படத்திற்கு இளையராஜா இசையமைத்துள்ளார் என்பது குறிப்பிடத்தக்கது.