தோற்றுப்போனேன்.. மாறிவிட்டேன் – சேரன் எடுத்த அதிரடி முடிவு

சில வருடங்களாக திரைப்படங்களை இயக்காமலும், நடிக்காமலும் இருந்த சேரன் தற்போது புதிய படங்களை இயக்கவுள்ளார்.

சேரன் கடைசியாக இயக்கிய படம் ஜே.கே. எனும் நண்பனின் வாழ்க்கை. இப்படத்திற்கு பின் சேரன் எந்த படத்தையும் இயக்கவில்லை. மேலும், எந்த திரைப்படத்திலும் நடிக்கவுமில்லை.

இந்நிலையில், அவர் தனது முகநூல் பக்கத்தில் ஒரு பதிவை வெளியிட்டுள்ளார். அதில் அவர் குறிப்பிட்டுள்ளதாவது:

என் இதயம் நிறைந்த அன்பு ரசிகர்களே..தொடர்ந்து எனக்கும் என் திரைப்படங்களுக்கும் ஆதரவு அளிக்கும் தமிழ் பண்பாளர்களே வணக்கம்..

மூன்று வருடங்களாக புதிய முயற்சி என்ற நோக்கில் மலையை புரட்டிப்போட்டுவிடலாம் என முயன்று முட்டி முட்டி முடியாமல் தோற்றுப்போனேன்.. பிறகுதான் புரிந்தது இங்கே சிறுகல்லை நகர்த்தக்கூட முடியாத அளவு தவறுகளும் பொறாமையுணர்வுகளும் பரந்தமனப்பான்மை இன்மையும் புரையோடிப்போயிருக்கிறது என..  எனவே இந்த சமூக மாற்றம் என்பது ஒரு நல்லவன் நினைத்து முடியப்போவதில்லை என புரிந்தபின்…

எனக்கு எது வேண்டுமோ அதை நோக்கி மட்டுமே பயணிப்பது என முடிவு செய்து இதோ திரைப்படம் உருவாக்க தயாராகிவிட்டேன். திருட்டு DVD யில் பார்த்தவர்கள் போக, ஆன்லைனில் முதல்நாளே எந்த கட்டணமுமின்றி இலவசமாக பார்த்தவர்கள் போக, அனுமதியின்றி பஸ்களில் படம் பார்ப்பவர்கள் போக நேர்மையாக உழைப்பை உணர்ந்து எவ்வளவுபேர் பணம் கொடுத்து படம் பார்க்கிறார்களோ அந்த பட்ஜெட்டில் மட்டுமே படம் எடுக்கலாம் என முடிவு செய்து இந்த வருடம் இரண்டு படங்கள் உருவாக்க உள்ளேன்.. எப்போதும்போல உங்கள் ஆதரவும், அரவணைப்பும் தேவை.. நன்றி.” என அவர் குறிப்பிட்டுள்ளார்.

அவரின் இந்த பதிவிற்கு பலரும் நேர்மறையான கருத்துகளையும், வரவேற்பையும் தெரிவித்து வருகின்றனர்.