EPS target 3 mla – தினகரனுக்கு ஆதரவாக செயல்பட்டதாக கூறி அதிமுக எம்.எல்.ஏக்கள் 3 பேர் மீதும் நடவடிக்கை எடுக்க வலியுறுத்தி அதிமுக கொறடா ராஜேந்திரன் சபாநாயக் தனபாலிடம் மனு அளித்துள்ளார்.

நாடாளுமன்ற தேர்தல் மற்றும் 22 தொகுதிகளின் இடைத்தேர்தலின் ரிசல்ட் வெளியாகவுள்ள நிலையில், இன்று தமிழக அரசியலில் சில பரபரப்பான சம்பவங்கள் நடைபெற்று வருகிறது. இன்று சபாநாயகர் தனபால் காலை அதிமுக எம்.எல்.ஏக்கள் கலைச்செல்வன், பிரபு, ரத்தினசபாபதி அதேபோல் தமிமுன் அன்சாரி ஆகிய 4 பேருக்கும் விளக்கம் கேட்டு நோட்டீஸ் அனுப்ப முடிவு செய்துள்ளதாக செய்தி வெளியானது. அதிமுக சின்னமான இரட்டை இலை சின்னத்தில் போட்டியிட்டு வெற்றி பெற்றுவிட்டு தினகரனுக்கு ஆதரவாக அவர்கள் செயல்படுதாக கூறப்பட்டிருந்தது.

இதன் பரபரப்பு அடங்குவதற்குள் அதிமுக எம்.எல்.ஏக்கள் கலைச்செல்வன், பிரபு, ரத்தினசபாபதி ஆகிய மூவர் மீதும் நடவடிக்கை எடுக்கும்படி அதிமுக கொறடா ராஜேந்திரன் சபாநாயகர் தனபாலிடம் கடிதம் கொடுத்துள்ளார். அவர்கள் மூவரும் தினகரனுக்கு ஆதரவாக செயல்பட்டதற்கான புகைப்படம் மற்றும் வீடியோக்களை அளித்துள்ளார்.

ஆனால், 40 நாடாளுமன்ற தொகுதி மற்றும் 22 சட்டமன்ற தொகுதிகளில் அதிமுக படு தோல்வி அடையும். எனவே, எப்படியாவது கட்சியை காப்பாற்றிக் கொள்ளும் பொருட்டே இந்த நடவடிக்கையை எடப்பாடி பழனிச்சாமி துவங்கியுள்ளார் என அமமுகவின் செய்தி தொடர்பாளர் புகழேந்தி தெரிவித்துள்ளார்.

அதாவது, 18 தொகுதி இடைத்தேர்தலில் எதிர்பார்த்த வெற்றி கிடைக்காமல் போனால் அதிமுக அரசு தனது ஆட்சியை இழக்க நேரிடும். எனவே, எம்.எல்.ஏக்களின் எண்ணிக்கையை குறைத்து அதன் மூலம் ஆட்சியை எப்படியாவது தக்க வைக்க முதல்வர் எடப்பாடி பழனிச்சாமி திட்டமிடுவதாக செய்திகள் கசிந்துள்ளது.