Bharathi Raja Vs Karu palaniyappan – தமிழ் திரைப்பட இயக்குனர் சங்கத்திற்கு தேர்தல் நடத்தாமல் பாரதிராஜாவை தலைவராக நியமித்தது தவறு என இயக்குனர் கரு.பழனியப்பன் தெரிவித்துள்ளார்.

சமீபத்தில் நடந்த தமிழ் திரையுலக இயக்குனர் சங்கத்தின் பொதுக்குழுவில் பாரதிராஜா போட்டியின்றி தலைவராக தேர்ந்தெடுக்கப்பட்டார். இதற்கு எஸ்.பி. ஜனநாதன் உட்பட சில இயக்குனர்கள் எதிர்ப்பு தெரிவித்தனர். இதைத் தொடர்ந்து பாரதிராஜா தனது பதவியை ராஜினாமா செய்தார். எனவே, வருகிற 14ம் தேதி தேர்தல் நடத்தப்படவுள்ளது.

இந்நிலையில், இன்று காலை வடபழனியில் இயக்குனர் சங்க பொதுக்குழு நடைபெற்றது. இதில் பேசிய கரு.பழனியப்பன் ‘ நீங்கள் எப்படி தேர்தல் நடத்தாமல் பாரதிராஜாவை தேர்வு செய்யலாம். மற்ற உறுப்பினர்களிடம் ஆலோசிக்க வேண்டாமா?’ என கேள்வி எழுப்பினார். இதற்கு அங்கிருந்த பாரதிராஜா ஆதரவாளர்கள் எதிர்ப்பு தெரிவித்தனர். இதனால், சற்று நேரம் சலசலப்பு ஏற்பட்டது.

அதன்பின் பேசிய பழனியப்பன் ‘இது என்ன இயக்குனர் சங்க அலுவகமா இல்லை கேளிக்கை விடுதியா என தெரியவில்லை. எங்கு பார்த்தாலும் காலி மது பாட்டிலாக இருக்கிறது. இயக்குனர் சங்க பொதுக்குழிவில் பாரதிராஜா கலந்து கொண்டதே இல்லை. தமிழ் சினிமாவின் முகத்தை மாற்றினார் என்பதற்காக பாரதிராஜாவை சாமி போல் கும்பிட முடியாது. அவரை இங்கு அழைத்து வந்த அவமானப்படுத்த வேண்டாம். பாரதிராஜா மீது மரியாதை இருக்கிறது. ஆனால், தேர்தலை நடத்தியே தலைவரை தேர்வு செய்ய வேண்டும்’ என அவர் பேசினார்.