சினிமா வாய்ப்பு – இளம்பெண்ணிடம் அத்து மீறிய தயாரிப்பாளர் கைது

சினிமாவில் நடிக்க வாய்ப்பு தருவதாக கூறி, இளம்பெண்ணை பாலியல் தொல்லைக்கு உட்படுத்திய கன்னட சினிமா தயாரிப்பாளரை போலீசார் கைது செய்துள்ளனர்.

2004ம் ஆண்டு வெளியான ‘ப்ரீதிமாயே ஹுஷாரூ’ என்ற கன்னட படத்தை தயாரித்தவர் விரேஷ். இவரிடம் ஒரு இளம்பெண் சினிமா வாய்ப்பு கேட்டுள்ளார். அவருக்கு வாய்ப்பு கொடுப்பதாக விரேஷ் உறுதியளித்திருந்தார்.

இந்நிலையில், கடந்த புதன் கிழமை அந்த இளம்பெண் அவரது வீட்டில் தனியாக இருந்தபோது விரேஷ் அங்கு சென்றுள்ளார். அவரிடம் சினிமா பற்றி பேச தொடங்கிய விரேஷ், மெல்ல மெல்ல அப்பெண்ணிற்கு பாலியல் தொல்லை கொடுத்துள்ளார். இதைக் கண்டு அதிர்ச்சியான அந்த பெண், அவரிடமிருந்து தப்பி வீட்டின் வெளியே ஓடி, கதவை மூடி தாழ்பாள் போட்டு விட்டு, அவரது குடும்பத்தினர் மற்றும் அக்கம் பக்கத்தினருக்கு இதுபற்றி தெரிவித்தார்.

இதையடுத்து அங்கு விரைந்த அப்பெண்ணின் உறவினர்களும், அக்கம் பக்கத்தினரும் விரேஷிற்கு தர்ம அடி கொடுத்ததோடு, இதுபற்றி போலீசாரிடம் புகார் அளித்தனர். இதையடுத்து, அவரை கைது செய்த போலீசார் அவரிடம் விசாரணை நடத்தி வருகின்றனர்.