எனக்கு அரசியல் பிடிக்காது; எனது பேச்சில் அரசியல் கலக்காதீர்கள்: ராகவா லாரன்ஸ் பளீச்

ராகவா லாரன்ஸ் கடந்த சில தினங்களுக்கு முன்பு திருப்பதி ஏழுமலையானை தரிசிக்க சென்றிருந்தார். கோவிலில் தரிசனம் செய்துவிட்டு திரும்பும்போது பத்திரிகையாளர்கள் அவரை சூழ்ந்து நீட் தேர்வுக்கு எதிரான இளைஞர்கள் நடத்தி வரும் போராட்டம் குறித்து கேள்விகளை எழுப்பினர். அப்போது, அவர் கூறும்போது, அனிதாவின் தற்கொலையை நினைத்துக்கூட பார்க்கமுடியவில்லை. இதுபோன்ற சம்பவங்கள் இனி நடக்காமல் பார்த்துக்கொள்ள வேண்டும். நீட் தேர்வுக்கு எதிராக போராடும் மாணவர்களை விமர்சிப்பவர்ளுக்கு காலம் பதில் சொல்லும் என்று சொல்லிவிட்டு சென்றார்.

ஆனால், அவர் பாரதீய ஜனதா கட்சியை விமர்சித்து பேசியதாக ஊடகங்களில் செய்திகள் வெளியானது. இதற்கு மறுப்பு தெரிவித்து ராகவா லாரன்ஸ் அறிக்கை ஒன்றை வெளியிட்டுள்ளார். அதில் அவர் கூறும்போது, ‘எனது ‘முனி 4’ படத்திற்கு பூஜை போடுவதற்காக திருப்பதி சென்றிருந்தேன். தரிசனம் முடித்து வரும் போது மீடியா நண்பர்கள் சிலர் படம் பற்றி கேட்டார்கள். சிலர் அம்மாவுக்கான கோயில் பற்றி கேட்டார்கள். கோயில் திறந்து ஒரு மண்டலம் முடிந்தது பற்றி சொன்னேன்.

நீட் விவகாரம் பற்றி கேட்டார்கள். நானும் “காலம் பதில் சொல்லும்” என்று ஒற்றை வரியில் பதில் சொன்னேன். ஆனால் வெளியிடப்பட்ட செய்தியில் பா.ஜ.காவுக்கு காலம் பதில் சொல்லும் என்று நான் சொன்னதாக வெளியிட்டுள்ளார்கள்.

சேவையும் ஆன்மீகமும் தான் எனக்கு பிடித்த விஷயம். அரசியல் அல்ல. அப்படி இருக்க நான் எப்படி பி.ஜே.பி பெயரை குறிப்பிடுவேன். அனிதா குடும்பத்திற்கு 15 லட்சம் நிதி கொடுத்தீர்களா? என்றும் கேட்டார்கள். அது கடவுளுக்கும் எனக்கும் அனிதா குடும்பத்திற்கும் மட்டும் தெரிந்தால் போதும் என்று சொன்னேன். தயவு செய்து என் பேச்சில் அரசியல் சேர்க்காதீர்கள்.

இவ்வாறு அதில் குறிப்பிட்டுள்ளார்.