கொலை வழக்கில் சிக்கி தண்டனை விதிக்கப்பட்ட சரவணபவன் ராஜகோபால் 18 ஆண்டுகளுக்குப் பிறகு சிறைக்கு சென்றுள்ளார்.

சரவண பவன் ஹோட்டலில் பணி செய்த ஜீவஜோதி என்ற பெண் ஊழியரை மூன்றாவதாக திருமனம் செய்துகொள்ள ஆசைப்பட்டார் சரவணபவன் உரிமையாளர் ராஜகோபால். இதற்கு தடையாக இருந்த ஜீவஜோதியின் கணவரனான பிரின்ஸ் சாந்தகுமாரை கூலிப்படை வைத்து கொலை செய்தார். இது சம்மந்தமான வழக்கில் 2004-ல் அவருக்கு 10 ஆண்டுகள் சிறைதண்டனை வழங்கப்பட்டது.

அதை எதிர்த்து அவர் 2009 ஆம் ஆண்டு  மேல் முறையீடு செய்ய ஆயுள் தண்டனை வழங்கப்பட்டது. இந்த தீர்ப்பை எதிர்த்து அவர் உச்ச நீதிமன்றத்தில் மேல்முறையீடு செய்ய இந்த தண்டனையை உறுதி செய்தது. மேலும் ஜூலை 7 ஆம் தேதிக்குள் நீதிமன்றத்தில் சரண்டர் ஆகவேண்டும் என உத்தரவிட்டது.

ஆனால் ராஜகோபால் தனது வயது மற்றும் உடல்நலக்கோளாறு காரணமாக தற்போது சரணடைய இயலாது என்றும் கால அவகாசம் வேண்டும் என்றும் உச்சநீதிமன்றத்தில் மனு தாக்கல் செய்தார். அந்த மனுவை நிராகரித்த நீதிபதிகள் உடனே சரணடைய வேண்டும் என உத்தரவு பிறப்பித்தனர்.

இதையடுத்து நேற்று மாலை விஜயா மருத்துவமனையிலிருந்து ஆம்புலன்ஸ் மூலமாக சென்னை நான்காவது குற்றவியல் நீதிமன்றத்தில் ராஜகோபால் ஆஜர்படுத்தப்பட்டார். இதையடுத்து சென்னை புழல் சிறையில் அடைக்கும்படி உத்தரவிட்டுத் தீர்ப்பளிக்கப்பட்டது. 71 வயதான ராஜகோபால் நேற்று சிறையில் அடைக்கப்பட்டதை அடுத்து 18 ஆண்டுகளாக இழுத்துக்கொண்டிருந்த வழக்கு முடிவுக்கு வந்துள்ளது.