Director Shankar 25 -பிரம்மாண்ட இயக்குனர் ஷங்கர் திரைத்துறைக்கு வந்து 25 ஆண்டுகள் ஆகிவிட்டதை அவரின் சக இயக்குனர்கள் ஒன்று கூடி கொண்டாடியுள்ளனர்.

தமிழ் சினிமாவில் 1993ம் ஆண்டு ஜெண்டில்மேன் படம் மூலம் இயக்குனராக அறிமுகமானவர் ஷங்கர். அதன்பின், காதலன், இந்தியன், ஜீன்ஸ் என பிரம்மாண்ட இயக்குனராக மாறினார். அவரின் படங்களுக்கு எனவே ரசிகர்கள் உருவாகினர். அதன்பின் முதல்வன், அந்நியன், பாய்ஸ், ஐ, எந்திரன் என் கலந்து கட்டி அடித்தார்.

ரஜினியை வைத்து ஏறக்குறைய ரூ.550 பட்ஜெட்டில் அவர் இயக்கிய 2.0 தென்னிந்தியாவில் அதிக பட்ஜெட்டில் படத்தை இயக்கிய இயக்குனர் என்ற பெயரை அவருக்கு தேடி வந்தது. தற்போது கமல்ஹாசனை வைத்து இந்தியன் 2 எடுக்கும் முயற்சியில் ஈடுபட்டுள்ளார். இவரிடம் உதவியாளராக இருந்த பாலாஜி சக்திவேல், அட்லி, வசந்த பாலன் அனைவரும் சிறந்த இயக்குனர்களாக தடம் பதித்து வருகின்றனர்.

இந்நிலையில், அவர் திரைத்துறைக்கு வந்து 25 வருடங்கள் ஆகிவிட்டதை கொண்டாடும் வகையில் இயக்குனர்கள் மணிரத்னம், கௌதம் வாசுதேவ் மேனன், லிங்குசாமி, பாண்டிராஜ், அட்லீ, பாலாஜி சக்திவேல், வசந்த பாலன், சசி, மோகன் ராஜா, பா.ரஞ்சித், எழில் உள்ளிட்ட பலரும் இயக்குனர் மிஷ்கினின் அலுவலகத்தில் நேற்று மாலை ஒன்று கூடி கொண்டாடினர். அவர்கள் அனைவரும் S என்ற இனிஷியலை பதிவிட்டிருந்த நீல நிற டீ சர்ட் அணிந்திருந்தனர்.

அப்போது எடுக்கப்பட்ட புகைப்படங்கள் சமூக வலைத்தளங்களில் வைரலாக வலம் வருகிறது.